"Reto Sa Mama" PART 5

Part 5 

December 2020, bisan pandemic dili mingaw among celebration sa Christmas kay kompleto mi sa akong pamilya ug pamilya ni Rey. Sa balay mi nilang Nang Ebz nag celebrate ug starring akong mga desserts syempre. Kanunay pud nga mag-atang among mata ni Rey ug unsay kan-on ni Nang Ebz kay basin molangkat ug panit sa lechon ug magpalabi ug tam-is. While busy ang tanan ug pang marites gibira ko ni Nang Ebz ug gidala sa iyang kwarto kay naa daw siyay ihatag nako. Nag expect nako ug hatagan napud ko niyag pila ka dozen nga panty pero nalipay ko nga dili diay. White sandal with heels iyang gihatag. Bantog rang sige siyag pangutana ug unsay size sa akong tiil ug na fit jod nako ug nice pud halatang mahalon, duda ko si Rey gihapon iyang gipabayad. Feeling nako adto ako si Cinderella ug si Nang Ebz akong fairygod mother.

Nang Ebz: " day kani imong isuot ug kaslon namong Rey ha. " 

Ako: " Grabe ka ka advanced Nang oy, pero salamat kaayo kay dili nako magpalit ug sandal. Ikaw puy sponsor ug sandal sa mga na asawa sa mga kuya ni Rey nang? " 

Nang Ebz: " hehehe, ikaw ra may gihatagan nako day. Ayaw nalaman saba nila. " 

Ay, may favoritism diay ni si Nang Ebz pero I can tell nga closed gihapon siya sa iyang mga binaje, adto gani siya tigtambay usahay sa ila aron maki marites. Ako lang jod siguro ang na closed ug maayo kay bisag sa wala pa mi ni Rey, bff naming duha kay tambay ko sa iyang tindahan dihang jobless pa ko. While iyang 3 ka binaje nakaila lang niya sa nauyab nila ang 3 kings ni Nang Ebz. For the first time, gigakos nako si Nang Ebz thankful kaayo ko nga siya akong mahimong mother in law ug mahimong lola sa akong future junaks. Saon nalag kontrabida sa akong kinabuhi akong future mother in law paniguradong buwag jod ming Rey. 

Aside sa gift ni Nang Ebz, nakadawat pud kog gift gikan kang Rey kaingon napud kog pila ka dosena nga panty pero dili diay kay rubber shoes. Nagkatawa nalang ko, like mother like son parehas ug utok jod. 

Ako: " nagkuyog mong Nang Ebz ug palit noh. Giapilan nalang unta pud ko ninyog tsinelas. " 

Rey: " lahi man to iya kay nig kasal paman to nimo isuot. Kani kay bisag ugma dayon pwede na nimong masuot. " 

Ako: " mauwaw man sad ta ani, wa man koy regalo naandam. " 

Rey: " ikaw gud, ikaw naman akong nadawat nga regalo. " 

Ako: " sesss, kiligon nako ana? " 

Rey: " labaw pa sa kilig imong bation kon bana nako nimo. "  

Labaw pa sa kilig? Mag kirig kirig na jod? We exchanged I love you's ni Rey then syempre chula ginagmay sa ngitngit before ko niya gihatod sa amoa kay nagpauwahi man jod ko kay mo igat pud tag ginagmay, ginagmay ra gud pud unya ra nang dinagko ug naa nay gipirmahan.  

New year, sa among balay ra mi nag celebrate kaming pamilya. Ug silang Rey sa ilaha rapud nag celebrate pero gidung gihapon ko ni Rey sa balay kay wa siya makontento sa ilang foods ug after ako napud ang gipul-an sa among foods tabok napud ming duha sa ilaha. Advantage jod ning silingan ra imong mauyab kay pila ra ka tambling inyong mga balay na way kas gasolina. Ako napud ang nibawos ug hatag nila Rey ug ni Nang Ebz. Gibitbit nako ka Nang Ebz ug kang Rey gihatag nako while nagpadung mi sa ilaha. Excited kaayo si Rey nga niabri kay giputos nakog maayo. Of course nibawos pud ko niya, Calvin Klein boxer brief lang gud pud akong gihatag. 

Rey: " ikaw nipalit ani? " 

Ako: " ay lisod pud ug si Mama, ako syempre. Medium na. " 

Rey: " medium? Large ko oy. " 

Ako: " Large ka? Kaingon kog small. " 

Rey: " paita pud ng small mura nag gituok akoa ana. " 

Nakatulon kog laway, susme unsa ka dako ang Large? Sorry wa ko ma inform nga Large iya nag expect kong small siya gi plus size pa nako. Dapat nangutana diay ko ug size niya. Ayo pag giparehas jod nakog pili ug mopalit kog itlog large kanunay akong pilion. Gibira napud ko niya ug chula in the dark napud makuratan lang mi kay naay mokalit ug pabuto sa silingan. About pud ka Nang Ebz, ang restored wedding photo nila sa iyang bana akong gift, with frame pa. Nakahilak tawon siya pagkakita kay gimingaw siya sa iyang bana. Gihad namo to sa iyang kwarto kay para kanunay niyang matan-aw ug momata o matug siya. 

Nang Ebz: " sigurado jod ko day des nga parehas sa akong bana si Rey. Sigurado jod nga pinanggaon kag taman, di ka magbasol. "

Ako: " maayo unta lagi nang. " 

Nang Ebz: " Duha ka klase ang Bana day. Naay Bana nga Bisan Asa Naang Asawa. Naa puy Bana nga Bisan Asa Naay Asawa. Pero sigurado jod kong Bana nga Bisan Asa Naang Asawa si Rey." 

Ako: " di gahapon kompyansa nang kay Bisan Asa Naay Aswang, mga baga ra ba jod ug nawong aswanga. " 

Nang Ebz: " hehehe, ikaw jod day, ug aswangon si Rey pila ra pagputol. " 

Ako: " sa buhi ni Rey? " 

Nang Ebz: " ay di! sa aswang pud naay pinuti nako diha ipahulam jod nako nimo. " 

Katawa jod kog maayo, abi kog ang gabitay ni Rey akong putlon. That was the best Christmas and New Year celebration for me, bisag pandemic happy kaayo ko. 

 Day off ko adto, nisuroy napud ko sa ilaha busy kaayo si Nang Ebz sa iyang tindahan kay gikan sila nangumpra ni Rey. Puno napud iyang tindahan daghan nag utangon ang silingan.

Nang Ebz: " day des! " 

Ako: " nang! Busy man, apply kog assistant manager diri be. " 

Nang Ebz: " wa koy ma sweldo nimo day hehehe. " 

Ako: " ang anak ra nimo ang isweldo nako nang ebz. " 

Nang Ebz: " ay wa koy ma sweldo karon day kay nilakaw si Rey. " 

So ni duty ko sa tindahan ni Nang Ebz that day kay siya ra pud usa. Gitabangan nako siyag arranged sa iyang mga tinda aron makafree kog snacks. Bisag asa na niabot among estorya ug ganahan jod kog siya akong ka chika kay parehas ming himantayon. Nakauli nako sa amoa pero nibalik pa jod ko ilang Nang Ebz kay naa koy nakalimtan ug nagdugay pa jod ko kay diha na si Rey pero si Nang Ebz lang gihapon akong ka chika hangtod sa ni ngitngit nalang. Gipugngan ko nilang duha nga sa ilaha ra manihapon pero kinahanglan kong mouli kay naay ipaluto si mama nako. Feeling nako anang adlawa gusto kong magbalik balik sa balay nila Nang Ebz. Mas nahimong clingy pa kong Nang Ebz kaysa kang Rey. 

 

Nakamata ko dukduk ni mama sa akong kwarto pagkabuntag, katugon pa kaayo kong niabri. 

Ako: " ma, ngano man? "

Mama: " wala nimo nanawag si Rey? " 

Ako: " wala man. "

Mama: " giadto daw ug hospital si Nang Ebyang gabie! "

Ako: " ha! Ngano man? " 

Mama: " na stroke daw! " 

Ako: " unsay na stroke? Didto man ko sa ilaha gahapon maayo paman to siya. " 

Mama: " ambot lagi! Niadto ko ron sa ila kay naay koy paliton, pero natagboan nako ang kuya ni Rey, nagdali kay moadtog hospital kay na hospital lagi daw iyang mama. Tawagi si Rey day! "

For a minute na blangko ko. Wa ko kahibalo ug unsay akong buhaton. Dili jod nako ma process kay gahapon pwerte pa namog chika. Si kuya nalang ang nanawag ni Rey pero dili ma contact si Rey so iyang kuya among gitawagan ug ang ingon lang nga na coma na iyang mama. Daghan unta kog pangutana pero nagdali ang kuya ni Rey. Nisulod dayon ko sa kwarto ug didto nagsigeg hilak. Naghilak ko dala ampo nga maka survive pa unta si Nang Ebz, nga maka attend pa siya sa among kasal ni Rey, nga makakita pa siya sa iyang apo namong Rey, nga unta magkita ug mag estorya pa ming duha. Balik balik jod na nakong giampo nga dili pa unta karon. Giingnan kong kuya nga papaulion daw si Rey sa ilang balay mao nga didto ko nag-atang sa ilaha. Naghilak ko nagtan-aw sa tindahan ni Nang Ebz nga sarado, ingon adto nga orasa busy na unta siya kaayo kay daghan ng motambay sa iyang tindahan pero makabungol kaayo ang kahilom. Gahapon busy pa siya anig arranged dili jod nako madawat, I wished nga damgo lang unta, it's a prank ra tanan pero dili kay ang tinood nag-atubang na si Nang Ebyang sa kamatayon. Pag-abot sa sakyanang Rey , natingala ko kay wala dayon siya ninaog ako pa siyang gi tuktok. Una nakong pangutana niya pag-abri kon komusta si Nang Ebz pero nitutuk lang siya nako ug dayon nihilak. Didto na nako siya gigakos ug taman ug sige siyag ingon " des si mama, di pa ko gustong mawal siya. " Wa koy laing mahimo ang i comfort ra jod si Rey nga makaya ra ni nang Ebz ang tanan. Gipakaon nako si Rey ug gipatulog aron mokalma. Nihangyo siya nako nga di sa nako siya biyaan bisag makatug siya, gihimo pud nako. Nakatulog pud tawon ko kaubang Rey pero pagmata nako ako man nuon ang iyang gibiyaan. Nagbilin ra siyag note nga kinahanglan siyang mobalik sa hospital. Strikto ang mga protocols sa hospital so dili jod mi makabisita ni nang Ebz. 

The next day pagkuha ni Papa nako gikan duty. Niingon siya nga giuli na si Nang Ebz sa ilahang balay. Nalipay ko kay ok na diay si Nang Ebz pero nahugno ug balik kay coma lang daw gihapon. Giuli nalang nilang Rey kay basin ug mag positive na hinoon si Nang Ebz sa covid. 

After nakog ilis, nidung dayon ko ilang Rey dili na parehas sa una ang kabibo sa ilang balay ug magtapok mi. Bug-at kaayo akong gibati pagsulod ug nisamot ug huot akong dughan pagkakita ni Nang Ebz sa iyang kwarto nga naghigda nalang ug gi oxygen na. Kahilakon kaayo ko pero gipugngan jod nako kay ingon nila makadungog pa daw si Nang Ebz. Sakit kaayo nga makita nga in-adto na diay siya kay lagsik pa kaayo siya sa niaging adlaw. Gihangyo nako si Rey nga biyaan sa ko , gusto nakong makig estorya ni Nang Ebz nga ako ra. Luya kaayo siyang nitando ug nilihok nga murag wa sa kaugalingon. Nalooy kong Rey, nalooy pud ko sa iyang mga Kuya kay si Nang Ebz nalang ang nahibilin nilang ginikanan.

Nigunit ko sa kamot ni Nang Ebz, mura ra jod siyag natulog nga grabeng hagok. Wa ko maanad nga in-adto iyang porma kay kada kita namo lagsik siya ug sigeg katawa.

" Nang si des ni, mata na. Dugay na kang natulog ba. Duol na baya among kasal ni Rey. "  

Wala na nako napugngan nga mohilak. Duol na among kasal ni Rey pero nganong nahitabo pa ni. Nahinumdom ko sa iyang hangyo nako nga tawgon siyang Mama, nagbasol jod ko nganong wala pa nako buhata adtong makatubag pa siya.

" Ma, kaslon pa ming Rey. Malain jod ko ug di ka makaattend. Gusto pa ka nakong maka uban. " 

I'm sure nadunggan ko ni Nang Ebz kay dihay nitulong luha sa iyang mata. Nisamot akong hilak. Gusto siguro niyang mo respond pero dili na siya makahimo. Daghan pa kog giingon ug gihangyo ni Nang Ebz pero dili na parehas sa una nga daghan pud iyang isumpay pero bisag pagbuka lang sa iyang mata di na siya makahimo. Aron wa koy basolan, nag promised ko daan ni Nang Ebz. Nag promised ko daan mentras makadungog pa siya.

" Ma, promise nako nimo dili nako biyaan si Rey. Panggaon nako siya parehas sa imong pagpangga niya. Dili nako pasagdan si Rey. Akoy bahala niya, Ma."  

Nagbasa iyang mata, siguradong nagdunggan ko niya. Ug sign na siguro to niya nga kinahanglan na namo siyang buhian.

Daghan kog pagbasol. Kon unta dali ra ko naka desisyon nga magpakasal ni Rey makauban pa unta namo si Nang Ebz sa adlaw sa among kasal. Kon unta nisugot ko sa December nga iyang gihangyo, nakaabot pa unta siya. Matawag pa unta nako siyang Mama kay mother in law na nako siya. Wala nako gibutang sa buot ang iyang giingon nga ayaw mo pagsalig nga naa pay taas nga panahon kay wa ta kahibalo ug buhi pa ba ta ugma. Kanunay siyang mohangyo nako pero wala nako siya paminawa kay kanunay kong magsalig nga naa pay taas nga panahon. Gibutang na unta tanan sa akong atubangan pero nasubrahan ra kaayo ko sa pag overthink. Pero ulahi na. Wala na nakahuwat pa si Nang Ebz. Namatay siya sa edad nga 67,

 2 months before sa among kasal.  

Mura pud kog namatyan ug inahan. Sakit kaayo kay daghan ming memories ni Nang Ebz. Closed pa nako siya kaysa kang Mama. Mingawon kaayo ko sa iyang mga katawa ug mga pahugot lines labina iyang mga jokes ug pagka prangka. Wala nay magtawag nako sa layo palang ug Day Des! ug makita nako iyang dako nga ngisi. Ako jod ang pinaka grabeng nihilak sa iyang paglubong. Grabe pa kong nihilak compare sa upat ka anak ni Nang Ebz. Kulang nalang mouban nako niya pero ug makahimo pag barog si Nang Ebz mobarog jod siya ug iya kong kasab-an kay kinahanglan pa nakong pakaslan iyang anak, naghago baya siyag reto namo. Ako pa ang gi comfort ni Rey imbes akoy mo comfort niya. Kadto jod ang pinaka grabe nakong hilak sa tibuok nakong kinabuhi, sakit pa sa gibuwagan. 

Gituman nakong promise ni Nang Ebz, wala nako gipasagdan si Rey. Paghuman sa lubong sa ilang balay ko natulog kay dili ko gustong mag inusara siya. Bisan dili ipakita kaayo ni Rey iyang emosyon while gihaya ug gilubong iyang mama ug kanunay niyang ingon nga dawat na niya pero kada gabie nga makamata ko kay wala siya sa akong tapad ug ang dungog nako nga paghilak niya sa kwarto ni Nang Ebz, klaro kaayo ang iyang gibati nga kasakit sa pagkawala sa iyang mama.  

Halos mag-ipon naming Rey kay dili nako mouli sa amoa. Sa ilaha ko mogikan sa work ug sa ilaha pud ko mouli. Naglibog na si Mama ug impakehon naba niya akong mga gamit ug dad-on sa balay ni Rey kay murag didto naman ko nagpuyo. Di siya halata nga excited nga molayas nako sa among balay. Bisan pa sa nahitabo, tuloy parin ang kasal. Mao pud ang gusto ni Rey. Mahadlok pud ko ug kalagon kog kalit ni Nang Ebz nganong gi postponed napud nako. Namatay nalang siya sa sige nakog overthink. Pero atleast happy together na siguro pud siya sa iyang bana.

One month before sa among wedding, ako napud ang nahilantan. Ang pagsulay sa kapalaran wa jod ko giundangan. Si Rey lang ang nag-atiman nako, wala niya padunga ang si bisan kinsa sa iyang balay. Wala pud siya nigawas. Nag home quarantine ming duha kay duda namo covid jod to pero wala ko niya gidala sa hospital kay mahadlok siyang di siya makakita nako ug gusto niyang siyay moatiman. Ubo, sip-on ug hilanat ug grabe akong pamaol murag gisumbag kog pila ka Manny Pacquiao. Tungod sa akong kainit gitakigan nakog maayo. I don't know ug hallucinations ra ba to nako o tinood jod nga gikalag ko ni Nang Ebz adtong tungora kay nadunggan nako iyang tingog. Nakaingon nalang ko ug iuban naman siguro ko ni Nang Ebz, nag change na iyang mind. Halos mahimo ng albularyo si Rey sa kadaghang herbal nga gipainom nako ug halos ma paksi na akong nawong sa mga toob session namong duha. Kaming duha ang magtuob kay nahadlok kong natakdan napud siya. Didto ra ko nakahibaw nga pwede diay e- toob apil ang kamatis kompleto rekados kay naay ahos ug luy-a ug bombay pa jod. Maglibog nako ug pang toob pa ba to o nagluto nag sud-an si Rey. Masuko raba ug mag reklamo pa ko. 

Ako: " nganong kompleto man nig lamas? Basig naa puy paminta ani. " 

Rey: " suwayan gud nato aron lipong ng virusa " 

Ako: " Ahos raman toy giingon ni Mama " 

Rey: " ay nag sigeg reklamo diha ayo mag di mi kaliwat ug albularyo. " 

Albularyong mini siguro.   

Sa way pagkusmod gisingo nako tanang lamas bisag murag nagtoob kog nilaw-oyan, kamunggay nalang jod kulang. Covid jod tong niigo nako kay tanang symptoms akong nabati. Lata na kaayo ko, di pud ko ganahan mokaon kay wa nakoy panlasa. Pero wa jod ko dad-a ni Rey sa hospital. Gipanindigan jod niya ang iyang pagka albularyong mini. Nalisang siguro ug maayo ang virus sa kadaghang gipakaon nga ahos ug gipatoob ni Rey nako nga bisag unsa. Effective ang gipang experiment ni Rey kay nigaan akong pamati pero pwerte lagi pung lutoa sa akong nawong. Ni action pag ubo si Rey pero wala nalang ni dayon ag virus kay gikilawan ug ahos ug bombay ni Rey, tigok deretso. So after na totally healed na jod ko, gi andam na dayon namo among kasal. Ready na jod ko pero dili na 100 % akong kalipay kay wa na si Mama Ebz. Si Mama Ebz nga gipul-an nag humuwat sa sige nakog overthink.   

A week before sa wedding gihimoan pa kog bridal shower sa akong mga bff's kay aside kang Mama Ebz naa sad koy mga ka bff since high school. Timing pud nga naay Auntie akong usa ka bff nga naay vacation house with swimming pool pa, di ok kaayo para sa among overnight. Kay hapit na lagi ko magapos ni Rey, pakit-on daw ko nilag laing lalaki. Ang wala sila kahibalo nga nakahibalo nako sa ilang plano. Nga nag hire daw silag macho dancer, pero nakahibalo nakong daan nga gisabot nila ang classmate ra pud namo nga bayot. Kay ang dakong bayot man pud ang nitug-an nako kay giinform ko daan niya nga siya to kay basin daw ug ako siyang lugoson. Nisugot lang daw siya kay nangayo siyag talent fee ug for the sake nalang sa akong bridal shower kaysa mag hire silag tinood nga macho dancer basig kami pay ma disgrasya. Nag set silag murag stage aron didto magsayaw sayaw ang dakong bayot nga ga brief. Susme akoy gilood lami birahon ang dapat birahon aron mogawas ang pagkabayot. Gi lap dance pako sa buing. Enjoy kaayo akong mga demonyitang bff's. Dihang ni text nako si Rey nga naa siya sa gawas. Halos isulod namog sako ang dakong bayot ug ilabay sa gawas kay basig makakita si Rey niya. Na guilty kaayo ko kay bisag bayot pa to lalaki gihapon. Gipaningot nuon kog maayo paggawas nako. 

Ako: " hi! Nganong naa man ka diri? " 

Rey: " gimingaw nimo. Nag unsa man mo sa sulod? Bibo man kaayo, puros ra mo mga bae? " 

Ako: " hahaha, oh puros ra mi bae Nag disco rami aron di laay. " 

Rey: " ah, gabie nami nahumag survey wa pa koy panihapon. " 

Ako: " asa man ka manihapon? " 

Rey: " ani, naa man kahay kaon ani. " 

Ako: " ah! HAHAHA aw oh gud." 

Apil likod nako nagbaha ang singot. Mao ra ni bridal shower nga naa ang groom ug nabalaka ko pagsulod ug na dispatsar naba nila ang dakong bayot kay basig makit-an ni Rey. Hinlo kaayo pagsulod namo apil ang stage nawagtang ug kalit. Hilom kaayo sila iyahay ug pabusy sa cellphone pero sa among gc pwerteng banhaa kay ngano daw nga naa si Rey ug ang bayot ilang gisulod sa aparador kay wala moangay nga sa cr siya gipatago. Kay usa ra may kwarto adtong balaya basin daw ug mosulod si Rey sa kwarto. Nabalaka pud tawon ko sa bayot so gi add nako siya sa gc aron makahibalo ming tanan ug ok ra ba siya. 

Bayot: " mga 1 min. nalang before ko mamatay diri sa suffocation mga yawa mo. "  

Maong gidala nalang nako sa may swimming pool si Rey ug didto siya gipakaon. Kay basin naay usa ka bayot nga mamatay sa aparador. Best bridal shower ever kay ang ending gidala kog apil ni Rey pauli kay di daw siya katug ug wa ko.