#SafeHaven Chapter III
***CHAPTER III***
Nilargo na ko sa private hospital nga gidal-an sa akoang lola. Naa sa gawas akoang uban na ig-agaw ug naa sa sulod sa ICU akoang auntie ug papa. Duha lang ang gina tugutan sa sulod na bisita maong pagkabalu nila nga naa na ko, nigawas na akoang auntie ug ako ang nipuli sa sulod.
Sakit makita si lola nga natauran ug tubo. Unconscious gihapon siya. Nakatrabaho ko sa hospital ug ato lang na oras naku na feel ang mga gipangbati sa pamilya diay sa akoang mga pasyente. Ang kahadlok. Ang kakulba nga sa bisan unsa nga segundo pwedeng mawala ang mahal nimu sa kinabuhi.
Gigunitan naku ang kamot ni lola. Gipahibalu naku siya nga naa naku. Nga okay ra ko. Nangayo ko ug pasaylo sa iyaha nga wala ko sa iyahang duol sa panahon nga gikinahanglan ko niya. Walay undang ang pagtulo sa akoang luha samtang gina kissan naku iyahang kamot.
Wala abtig oras ug sa dihang gitabang si lola. Nagkaguliyang ang mga nurses ug doctor samtang ako gigakos ko sa akoang papa. Gisulayan nila ug revive pero wala jud nakakaya si lola. Nibiya jud siya.
Halos nawad-an ko ug panimuot sa nahitabo. Okay pa man siya sa miaging adlaw. Kauban pa namu siya ni PJ nanlaag, pero kalit lang nga nawala siya. Kalit ra kaayo ang panghitabo. Kalit ra jud.💔ðŸ˜
Napuno ug kasakit. Na shock ming tanan. Nangutana ko sa akoang ig-agaw kung naunsa pagka hitaboa sa kay lola. Nganung nikalit ra man ang tanan. Nagtinan-away pa na sila na murag dili nila gusto mahibal-an naku ang rason. Kadugayan kay akoang auntie na ang nitubag. Nahitabo ang tanan tungod sa akoa. Tungod sa amua ni PJ. Tungod sa akoang mga ig-agaw.
Nagstoryahanay daw na akoang ig-agaw parte sa nahitabo namung duha ni PJ. Nga nakabuntis si PJ. Na dili na madayon ang kasal. Nga milakaw ko sa balay. Pero wala nila namatikdan nga naa si Lola nga nakadungog sa ilaha nga nagchismis. Wala silay intensyon na ipahibalo kay lola kay lagi masakiton siya ug bawal sa iyaha ang makunsimisyon, pero wala natuyo ug nahibal-an ni lola ang tanan. Bisan unsaon nila ug ingun nga okay ra ko, nga nagpahibalu na kong okay ra ko sa akoang mama, naguol jud daw si lola ug mao na tong pagka atakeha niya. Sa nahitabo namu ni PJ, si Lola ang wala kadawat. Siya ang nasakitan pag-ayo.
Siya ang number 1 nga nagmahal sa amuang duha ni PJ. Permi namu na siyang kauban kung manglaag mi sa park ug ginasakay namu siya sa wheelchair kung kapuyon na siyang magbaklay. Paralyzed na ang half-body ni lola sa niaging tuig samtang naa pa ko sa abroad. Maong pag-uli naku gina atiman naku siya ug wala mi buluhaton na para sa kasal.
Sakit huna-hunaon nga naamong si lola sa nahitabo namu ni PJ, pero mas sakit na wala koy nabuhat para man lang masalba siya. Nga naa ko sa layo samtang gitabang siya.ðŸ˜
Wala na ko kakaya ug atubang pa sa ilaha sa akoang nahibal-an. Nakadagan ko paingun sa gawas samtang wala nay undang ug tulo akoang luha. Gialaot ko sa kapalaran. Sunod-sunod na kasakit ug pagkawala sa akoa sa mga importanteng tao sa akoang kinabuhi. Wala man unta koy sala. Wala man koy gidaug-daug na tao. Wala man koy giapakan na katungod. Wala ko nag-abusar pero gisilutan naman hinuon ko.
Sala na kwestyunon ang Ginoo pero dili naku mapugngan akoang kaugalingon. "Sa asa ko nasipyat Lord? Nganung nahitabo man ni sa akoa tanan Lord?" mao ra jud akoang nastorya samtang gipagawas naku sa poste sa hospital ang tanan nakung kasakit.
Nisunod na sa akoa ang isa naku ka ig-agaw na lalaki. si Joshua. Gigakos na lang ko niya. Sakit kaayo jud. Gi assist na lang ko niya paadto sa sakyanan kay paulion na lang lagi daw mi ug una. Nidili pa unta ko pero akoang papa na ang nag ingun. Siya na ang nagdrive pauli sa balay.
Akoang papa ug ang akoang auntie ang nag-asikaso sa patayng lawas ni lola samtang ako, halos dili gihapon maistorya sa bisan kinsa. Ang pagbasul naku sa akoang kaugalingon sa tanan nga nahitabo mao lang ang nagbalik-balik sa akoang utok.
Palangga kaayo ko ni Lola kay ako ang kinamaguwangan na apo nga babae. Suod kaayo ming duha ato niya, pero sa kalit lang na panghitabo nawala siya. Dungag pa sa akoang konsensya ang nahibal-an nga ako ang rason nganung giatake siya.
Gibalikan naku ang mga messages. Nakita naku ang grabe nilang pangita sa akoa sa kadlawon pa lang dayon sa pag-atake ni lola. Gipangita daw ko ni lola. Gusto daw kong makaistorya. Pero wala jud ko nila makontak. Daku kaayo akoang pagmahay labi na sa akoang kaugalingon, pero bisan unsaon pa man naku, nahitabu na ang tanan. Nawala na si lola ug wala na koy mabuhat pa.
Giplastar ang haya ni lola sa balay sa akoang auntie. Daghan ang nag asikaso na mga kaparyentehan. Naa pud mga silingan nga nagserbisyo, samtang ako kay halos wala ko natarug sa akoang gilingkudan sa atubangan sa lungon ni lola. Wala ko halos nikaon. Halos nawad-an na ko ug gana sa tanan.
Nag abot-abot ang mga higala nga nakiramay. Nangabot pud akoang mga barkada. Kadugayan ana, naay kalit nga commotion sa gawas ug nakuha ang atensyon sa mga tao. Nagdagan na sa akoa akoang ig-agaw na bae ug nagpahibalu nga naa daw si PJ sa gawas ug nasumbagan daw sa akoang isa ig-agaw na laki. Si Joshua.
Dali ra pud kong nigawas ug nakit-an naku si PJ nga nagkadugo na ang kilid sa baba samtang gipugngan na pud ang akoang ig-agaw.
"Nakaako pa ka ug pakita diri human sa imung nabuhat kay ate Ayen!" suko kaayo na ingun ni Josh.
Wala ra mitubag si PJ ug nagpamahid sa nagtulo nga dugo. Gi alalayan pud siya sa mga ig-agaw naku na babae.
"Tan-awa! Tan-awa ang resulta sa imuhang kagago! Tan-awa ang nahitabo kay lola!" dungag pa ni Josh na gusto pang muatake kay PJ.
Gi awat na si Josh sa uban nakung paryente ug gipalayo na didto sa may haya. Samtang ako kay speechless lang gihapon ug way undang ang tulo sa luha. Sakit kaayo nga magpabilin sa huna-huna sa mga paryente na ang hinungdan sa pagkawala ni lola kay kaming duha ni PJ.
Wala ra ko magtagad sa kay PJ. Nisuway na siya ug duol pero ako na ang nipalayo. Dili ko gusto magdungag pa ug scene sa sulod maong nilargo na lang ko ug lakaw pauli sa balay. Nisunod na si PJ sa akoa.
Nilargo ko sa likod sa amuang balay ug naglingkod ko sa usa sa mga bangko didto sa likod. Kalit ng niluhod si PJ sa akoang atubangan ug nagunit sa akoang duha ka kamot.
"I'm sorry. I'm so sorry. Pasayloa ko Boo." mao lang iyahang naingun.
Naghinilakay na ming duha. Nigakos na siya sa akoang hawak samtang walay undang sa pagtulo sa amuang mga luha. Wala nay pulos tanan pagmahay. Dili na mabalik pa ang kinabuhi ni lola.
Kadugayan namu didto sa ato na posisyon, ako na ang unang nitingog.
"Ayaw usa ko samuka karun PJ. Palihug lang. Sakit na kaayo. Hatagi ko ug panahon. Hatagi ko ug kalinaw." ingun naku
Hinay-hinay na niyang gitanggal ang iyahang mga kamot ug nibuhi na siya sa akoa. Nitindog pud ko dayon ug gibiyaan siya. Nilargo na ko ug saka sa akoang kwarto.
Daghan kaayo ang panghitabo sulod sa 72hrs. Halos dili na kayang i cater sa akoang utok ug kasing-kasing. Si PJ ug si lola. Parehong importante sa akoa. Perehong parte sa akoang kagahapon na dili na kaya pang mahimung parte sa akoang ugma.
Taod-taod kay nanuktok na si mama sa akoang kwarto, ug pagkabalu niya nga dili lock, nisulod na dayon siya. Gigakos ko niya samtang naghilak ming duha. Nityabaw na jud ko pag-ayo.
"Mao ni akoang ginalikayan na mahitabo. Ang makita ka sa tumang kasakit." naghilak na ingun ni mama sa akoa.
"Pasaylua mi nak nga gitago namu sa imuha ang tanan. Dili lang ka namu gusto na masakitan. Dili namu gusto na mag-antos ka. Saksi ming tanan kung unsa nimu ka pinangga si PJ. Kung unsa ka kamalipayon nga kauban siya. Ug dili mi andam na makita ka sa ingun ani na sitwasyon. Sorry nak" dugang pa ni mama
Tuod man, saksi silang tanan sa amuang duha ni PJ. Dili lang ako ang nagmahal sa iyaha kundi ang tibuok naku na pamilya, maong dili lang pud ako ang nasakitan, kundi kaming tanan.
Siyam ka adlaw usa gilubong si lola. Gabalik-balik pa na si PJ sa haya kung bakante siya. Daghang tao pero wala koy panahon mu abi-abi sa miskan kay kinsa. Niabot ang pamilya ni PJ sa last vigil. Niatubang ko sa ilaha isip respeto ug ingun man gapasalamat ko sa ilahang pag-abot. Daku kaayong kawad-on sa akoang pagkatao ang tanan nga nahitabo. Mapasalamaton pud ko sa akoang ginikanan nga perming nag assist sa akoa sa tibuok panahon nga magluksa ko. Sama naku, kami tanan nawad-an, pero murag sa amuang tanan, ako ang pinaka nasakitan.
Human sa lubong. Halos wala na ko gagawasan sa balay. Wala man hinuon ko gapabaya sa akoang lawas. Nawalaan lang jud ko ug gana sa tanan. Girespeto ra pud sa akoang ginikanan akoang gipangayong panahon nga madawat ang panghitabo. Kapila nibisita si PJ pero wala pa koy igong kusog na muatubang. Gipasabot siya sa akoang ginikanan na hatagan usa ko ug panahon. Ingun man permi silang gapahinumdum na dili ko angay magkulong sa kagahapon. Nga ang tanan nahitabo kay naay rason. Ug naa pay muabutay na maayong ugma para naku.
{To be continued...}
No comments:
Post a Comment