"Safe Haven" CHAPTER 6

#SafeHaven Chapter VI

***CHAPTER VI***

Pag-abot naku sa balay, nakit-an naku ang message ni Daryll na

"Message me kung makaabot na ka. Amping"

Nireply ra pud ko ug "Home now"

Ana dayon siya ug "Great. Rest sa"

Tubag pud ko ug "Yeah tnx. tulog sa q"

Ana siya "wc. tyt"

Tipid pa kaayo amuang mga text ni Daryll. Gikapoy pud ko sa byahe maong nipahuway sa jud ko sa sala. Kapoy pero wala ko katulog kay naa ra sa akoang huna-huna ang mga nahitabo sa adlawan.

Life changing para sa akoa ang pagkita namu ni Daryll. Nausab ang panglantaw naku para sa akoang kinabuhi. Abugado siya. Taas siya ug naeskwelahan ug mao ang nakahatag ug kadasig sa akoa na makakab-ot pa ug taas na edukasyon.

Sa tinuod lang, sa naa pa ko sa sulod sa ilahang law firm, naa sa akuang utok ang daghang what ifs. What if mahimong ingun ato pud akoang kinabuhi. Nga naay kaugalingon na clinic. Naay assistant. Naay office name plate nga nagsugod sa doctor (Dr) ug nasulod sa akoang huna-huna na what if ipadayon naku akoang pangandoy na mahimung Doctor

Sukad pagkabata pa naku, mao na akoang perming tubag kada naay mangutana sa akoa kung unsa akoang gusto inig kadaku. Suportado pud ko sa akoang mga ginikanan ug samut na si lola. Ang mahimung doctor na jud unta ang na set naku na long term goal sa akoang kinabuhi. 

Sa high school pa lang ko, nastoryhan pa namu na tanan sa balay kay naa man gud duha ka option, fast track ug slow/standard track para makab-ot ang dream nga Doctor of Medicine (MD) degree.

Ang kalahian man gud, kay sa fast track, pwede nimu makuha ang MD degree sa sulod lang sa 6-7 yrs, pero ang mga dagkung skwelahan lang pud ang ga offer ana na pamaagi. Samantalang sa standard track, mao ning mukumpleto ka ug bachelor's degree usa musulod sa medical school.

Ang gusto sa akoang papa dati kaya fast track na ko largo after high school total kay tag-as man daw akoang grado maong sigurado daw na makasulod ko, pero nibabag na akoang mama ug lola kay mag baccalaureate degree na lang sa lagi daw ko.

Mas gipili naku ang standard track para naa koy igung oras na huna-hunaon akoang future. Kay basin unya ug sa tunga-tunga dili na diay ko ganahan. Maong nagtake ko ug pre-med course na B.S. Nursing para mas ma prepare ko sa mga challenges sa medical school ug sa internship. Like ma practice ko kung unsaon pagbuild ug rapport sa mga pasyente ug makig collaborate sa uban pang medical professionals. Nakatabang jud pud sa akoa na i translate ang kahibalu naku gikan sa libro ngadto sa practical na nga application.

Pero tungod kay nakaila naku si PJ sa college, nawala nuon akoang plano na mupadayon sa medical school kay syempre kailangan ug taas na oras ug kailangan pud naku mupalayo sa iyaha kung didto ko muskwela sa dakong skwelahan sa Manila. Naexcited pud kaayo ko na mugunit ug akoang hinaguan nga kwarta maong pagkapasar naku ug exam, nidretso na dayon ko ug trabaho. Hangtod nawala na lang jud hinuon sa akoang huna-huna ang mupadayon. 

Pero pagkakita naku kay Daryll, mura ug gigamyan ra ko sa akoang kaugalingon. Kanang feeling naku kay dili mi level kay abugado siya unya registered nurse ra ko. Gihuna-huna jud naku ug taman kung kayahon ba naku ang mupadayon ug skwela sa medical school.

Dakung sakripisyo ang gikinahanglan. Walay katapusan na sleepless nights nga layo sa pamilya ug barkada. Ug sure ko na ang mahitabo na pud kay luxury na ang tulog ug ang social life. Idungag pa ang hospital politics, demanding na mga pasyente, murag dili makatao na work schedules, ug ang corrupt na healthcare system maoy siguradong mudrain na pud sa tanan naku nga positivity ug basin abot sa panahon, ma question na pud naku akoang mga desisyon sa kinabuhi.

Gitimbang-timbang naku ug taman hangtod sa naka desisyon ko na mupadayon na jud. 

Giingnan naku akoang mama ug papa sa akoang plano. Medyo nasurprise na sila sa akoang desisyon pero nalipay sila nga nagka interest ko ug balik na muskwela. Ingun sila na dili daw ko mabalaka kay kaya ra man daw ang mahimung gastos. Nag iyahay pa na sila ug pili ug skwelahan sa Manila nga akoang sudlan. Excited kaayo silang duha.

Nagsearch na dayon ko ug medical school na gwapong sudlan. Pero syempre daghan ko ug kailangan na iconsider na factors kay naay mga prestigious na skwelahan nga taas pud kaayo ug standard. Isa na ang NMAT percentile cut-off nila sa ginadawat nila na mga studyante, kay kung dili kaabot imuhang score, dili jud ka nila dawaton.

Ikaduha kay ang tuition fee sa maong school. Pero financially stable man nuon ang akoang ginikanan maong kaya ra kaayo suportahan akoang eskwela hangtod mahuman. Gitan-aw jud pud naku ang board exam performance sa matag school. Ang ilahang passing rate sa mga niaging board. Mag reflect man gud sa kung unsa ang quality sa teaching ug training nga ilahang ginaprovide sa mga studyante. Usahay, una natung gina consider ang location sa eskwelahan pero para sa akoa mas maayo na muskwela ko sa skwelahan na maayo ug track record.

Nagpadayon amuang kumunikasyon ni Daryll. Nahimung friends na pud mi sa facebook. Naingnan na pud naku siya sa akoang plano. Gipangutana pa ko niya kung sure na ba jud ko sa akoang desisyon kay pila pud katuig ang kailangan naku isurvive once musulod na ko sa medical school. Nitubag ra pud ko nga sure na ko.

Usa pa man ko nakalakaw ug nakasugod ug process sa akoang tanan papers, nilaag na siya sa amuang balay. Kataw-anan pa jud kaayo kay wala man siya nagpahibalu nga muabot siya. Wa man gani nangayo sa akoang address. 

Namubo ko ato sa mga bulak namu sa tugkaran na gamit ang hose ug gakayamukat pa jud akoang nawong kay gibugkutan ra ko na akoang buhok na way panudlay, naka tshirt nga loose kaayo ug mubo kaayo na short na dili na gani makita kay natabunan sa t-shirt. Nikalit na ug hunong iyang sakyanan atubangan sa balay. Gaduha-duha pa ko kung mudagan ba sa sulod or muatubang ko sa iyaha na ingun ato ang dagway, pero kay nakit-an naman ko niya, napugos na jud ko ug abri sa gate ug musugat bisan gakayamukat. 

Daku kaayo iyahang ngisi samtang gitunol ang bouquet ug paper bag sa akoa. Gapasalamat ra pud ko dayon. Gipasulod naku na siya sa amuang balay ug tungod kay weekend to, naa pareho akoang ginikanan. Na surprise na sila mama ug papa pagkakita sa kay Daryll ug gipa ila-ila naku sila. 

Medyo bukhad kaayo akoang heart pag introduce naku kay Daryll kay pina "Ma, Pa, si Atty Daryll diay, anak ni SB member M*****". Mura jud ug ga ambak-ambak akoang heart sa sulod sa akoang dughan kay syempre, abugado na gud na unya gikan pa jud sa well-known nga apelyedo. Proud na kaayo ko daw (murag uyab🤣)

Ang nawong gud ni Mama kay mura ug dili katuo ug naay halong panungog na nagtan-aw sa akoa. Sa iyahang tinan-awan pa lang mabasa na naku nga "asa ka nakabingwit ani?" na nga reaksyon.

Kita pud sa reaksyon ni papa na bilib siya kay Daryll kay lagi kabalu siya nga dili basta-basta ang mahimung abugado kay abugado man pud siya.

Gibilin pa naku sa ilaha si Daryll kay nanlimpyo pa ko sa akoang dagway para presentable ko nga muatubang niya. Sure jud ko na igisa nila si Dayll ug mapuno jud siya ug pangutana, pero kay abugado man siya, bahala na siyang ipagtanggol iyahang kaugalingon ug nilargo na ko sa akoang kwarto. Galangay-langay pa ko ug andam sa akoang suoton. 

Sa naa naku sa shower, didto lang naku narealize na what if mutug-an si Daryll kung sa unsa nga way mi unang nagkita. Patay na jud ko. Sa way pagdugay-dugay, gakabad-kabad ko ug human ug ligo ug nag-ilis, human gawas na sa kwarto para mapugngan siya. 

Naabtan naku sila nga gasige ra ug pangatawa ni papa nga ga reminisce sa ilahang tagsa-tagsa na kaagi sa law school. Mura ug nakalma na akoang heart ato na time. 

Giingnan na si Daryll ni mama nga didto na lang maniudto sa balay. Gitawag pud ko ni mama ug gipatabang ko ug andam sa kusina, pero kabalu na ko sa tuyo ni mama, ang magsukit-sukit parte sa storya namu ni Daryll.

Pili kaayo akoang mga gipangbuhian na words para dili mabuking sa pangit naku nga binuhatan didto sa resort. Mura pud ug nibalik si mama sa pagka teenager nga naminaw sa akoa while nag share. Ingun si mama na happy daw siya kay naka get over na daw ko kay PJ. Didto lang naku na realize nga tama diay, naka kove on ra ko kay PJ ug nawala naman diay siya sa akoang sistema. 

Hapsay ra kaayo sa akoang paminaw ang makita sila papa nga gi welcome ug tarung si Daryll sa balay. Sa unang higayon, nakauban namu na siya sa pani-udto, ug lingaw ra pud kaayo si papa nga bida permanente sa storya. 

Pagkahuman ug kaon, gihatagan na mi ug panahon nila papa nga mag storya. Mas gipili naku nga sa likod sa balay magtambay para dili kaayo agaw pansin sa mga silingan. Naa may backyard garden amuang balay, naay lingkudanan ug lamesa, ug naa puy duyan maong kumportable ra kaayo mi didto. 

Personal naku nga gi storya ug usab kay daryll akoang plano sa medical school. Kung kanus-a ko mulakaw sa balay ug kung asa akoang gusto nga skwelahan. Halos gi share naku tanan nga plano ug ingun siya nga naa ra daw siya nga musuporta sa akoa ug dili daw ko magduha-duha ug ingun sa iya kung manginahanglan ko ug tabang. Ni ingun pud na siya nga mubisita ra siya sa akoa sa Manila puhon ug naa na ko didto.  

Pagkahapon niuli ra dayon na si Daryll. Nakuha naku ang approval nila mama ug papa para kay Daryll. Malipayon sila para sa akoa kay saksi man sila sa akoang kasakit nga giagian.

Human atong pagbisita ni Daryll sa balay, gapadayon gihapon amuang kontak. Permi na siyang mangumusta sa kada gabie. Muingon ra na siya sa akoa nga "i chat ko kung bakante ka". Pero halos kada gabie mi nagahin ug oras na magtawagay. 

Pinaka una nakung gi focusan ang examination, kay usa ka makaenroll sa bisan asa na medical school, kinahanglan nimu mu take ug ipasar ang National Medical Admission Test (NMAT). Aptitude exam ni siya nga musukod kung unsa ka kaready na ihandle ang Academic demands sa medical school. Unya kay ikaduha lang man sa isa ka tuig ni nga pa exam, gihulatan pa jud naku kung kanus-a ang schedule na gina administered sa CEM (Center for Educational Measurement, Inc)

Grabeng kulbaa ato na exam kay pila na baya ko katuig nibiya sa skwelahan. Unya given na pa jud na ang gusto naku nga school kay taas kaayo ug percentile cut-off. Pero gikaluy-an man pud hinuon sa Ginoo kay na surpassed naku ang ilahang cut-off. Duha lang man gud ang basehan sa mga medical school usa ka makasulod. Ang imuhang NMAT score ug ang imuhang GWA. Maayo pud noon ko ug grades pag college maong dili ra ikabalaka

Nilarga ko pa Manila. Nitake ko ug entrance exam sa skwelahan nga gusto naku ug gikaluy-an pud na napasar gihapon.

After naku napasar ang tanan nga screening procedure, sama sa entrace exam ug interview, gipangayuan gihapon ko ug    

CEMed (Certificate of Eligibility for Admission to a Medical Course) nga gikuha pa naku sa CHED.

Dili jud dali ang makasulod sa medical school. Sa pagkumpleto pa lang sa mga required documents mura na ko ug mabuang. Gikan sa lahi-lahing exams, mga certificates, letters, clearances, interviews ug uban pa. Ug nakaingun jud ko na para sa akoa ang mahimung medical student kay napasar man naku tanan ug nadawat man ko sa akoang pinakagusto na eskwelahan.

Nag dorm na ko duol sa skwelahan para dili ra kaayo hasul. Tanan supporta gihatag sa akoang ginikanan sa akoa ug apil na pud si Daryll.

{To be continued...}