Chapter I
https://m.facebook.com/story.php?story_fbid=118874350653467&id=109614031579499
***CHAPTER II***
Padayon kung naglakaw paadto sa tunga hangtod sa nahimu ng tagahawak ang tubig. Nagkadugay, nagkalayo na ko sa baybay ug mas ninindot na akoang paminaw. Grabe ka comforting. Murag ginapafeel sa tubig na sige lang, ipalutaw ra tanan imung kasakit ug kalagot.
Hapit na taga abaga naku ang tubig ug ngit-ngit na ang palibot sa dagat. Wala pa jud unta koy plano muhunong pero naay nikalit ug bira sa akoang kamot. Paglingi naku, usa siya ka lalaki.
"Buhii ko!" ingun naku ug sabay bunlot sa akoang kamot
Pero perti niya ka kusgan. Iyaha jud kong giguyod pabalik sa daplin
"Buhii ko ba!" Nisinggit na ko ug usab
"Hubog na ka. Balik ta sa daplin, ta!" Tubag niya while wala lang gihapon siyay undang pag guyod sa akoa.
"Pasagdie ko. Wala kay labot sa akoa!" padayon gihapon akoang pagginahi kay wala lagi ko kaila sa lalaki.
Ug wala naku damha kay kalit ra kong gibus-at sa lalaki. Nagkisi kisi pa ko, pero kusgan jud siya. Wala ra jud siya nagtagad sa akoang kalihukan while naa ko sa iyahang duha ka kamot hangtod sa gibutang ko niya sa akoang shawl.
Nagtindog na siya sa akoang atubangan.
"Unsa diay imung gihuna-huna?" Suko kaayo siya sa iyahang tingog.
Na shock ko. Wala dayon ko ka tubag.
"Kung wala ta ka nakit-an, asa ka puniton?" Mas nisamot ka seryoso iyahang tingog.
"Wala kay pamilya nga naghulat sa imuha? Wala kay ginikanan nga mabalaka ug mamroblema kung maunsa ka? Unsa diay kadaku na imuhang problema diay nga kinahanglan man nimu sayangan imuhang kinabuhi?" grabe na jud niyang sukoa.
Wala na ko katingog ug nihilak na lang ko. Didto lang naku narealize nga gamay na lang diay kulang, madisgrasya na unta ko atong gabhiuna.
Nilingkod na siya tapad sa akoa ug nag tan-aw sa layo.
"Kaganina pa ta ka nakit-an diri. Kabalu ko nga naa kay problema. Kabalu ko nga naa kay ginaagian na kasakit karun. Ug tama ra jud na wala naku walaa akoang panan-aw sa imuha" kalmado na iyahang tingog ug nilingi na siya sa akoa.
"Gasa sa atua ang atuang kinabuhi. Dili natu angay na sayangan" dungag pa niya.
Naulaw ko sa akoang kaugalingun. Gusto ra man unta ko maligo. Gusto lang man ko mupahulay ug magpafloating sa dagat, pero lahi naman unta diay akoang dangatan.
Kalit niyang giakob sa akoa iyahang jacket. Wala ra pud ko nibalibad kay nakabati namn pud ko ug kabugnaw. Wala lang gihapon nawala ang kasakit sa akoang dughan ug wa na jud hinuon nihunong ug tulo akoang luha.
Kadugayan, nitindog na ko ug nakadesisyon na nga mubalik sa akoang cottage. Nikalit na siya ug pugong sa akoang kamot.
"Kailangan nimu ug kauban. Dili ta ka pwede pasagdan" maoy ingun sa lalaki
Gitan-aw ra naku siya. Wala ko kaila sa iyaha pero sa akoang paminaw mura man siya ug buotan ug kasaligan.
"Shot?" Pangutana niya.
Nitando ra ko. Siguro mas lami muinum kung naay kauban. Ug kung naay maminaw na stranger.
Gi alalayan ko niya paingun sa iyahang cottage. While siya na ang nagbitbit sa akoang shawl ug purse ug gamit lang gihapon naku iyahang jacket. Sa akoang pagkahinumdum, naa ra pud sa duol sa iyang cottage ang akoang cottage.
Mura ko ug piso nga nabasa. Dungagan pa sa kabugnaw sa aircon sa sulod. Nagdali-dali na siya ug kuha sa towel ug gitunulan pud ko niya ug sinina ug shorts niya.
"Una na ug kaligo. Gamita usa nang akoang sinina." Ingun niya human iyahang gitudlo ang direction sa shower room.
Mura ko ug batang gamay nga nisunod lang sa kung unsa iyahang gi ingun. Nilargo ko sa cr. Mura ko ug nahuwas huwasan sa hot shower ug nag ilis na dayon ko paghuman. Ilado ko nga Ms prim and proper ug sukad-sukad wala ko nigamit ug sinina sa laing tao, pero atong higayuna, mura ug nawala tanan sa linya sa akoang pagkatao ang akoang mga binuhatan. Akoa na lang pong gihalay akoang two-piece sa cr kay naa may sab-itanan.
Human naku nakagawas, siya na dayon ang nisunod ug gamit sa shower. Nabasa pud baya siya tungod sa iyahang pagsunod sa akoa didto sa dagat.
Pareha mi ug design sa gikuhang cottage. Naay mini fridge nga naay mga karga nga drinks ug daghan pud mga chips sa basket. Actually kato na mga stock, sa resort to. Pwede ra ka mukuha didto unya ilaha lang i inventory unya if magcheck out na ka, isahon ra ug bill tanan.
Nagkuha ko ug duha ka beer in can ug chips ug naglingkod ko sa rattan nga lingkudanan na duol sa bintana. Nagbalik-balik na pud sa akoang huna-huna ang hitsura sa babaeng buntis. Gwapa siya. Sa tan-aw naku edukada pud. Wala koy nahibal-an sa storya nila ni PJ, pero isa lang man jud ang klaro, and muabutay nila nga anak.
Gihigugma man naku si PJ. Siya ang kauban naku sa akoang mga pangandoy. Siya ang gigusto naku na mahimung amahan sa akoang mga anak ug mahimung kapikas sa kinabuhi. Siya ang pagtuo naku nga maghulat sa akoa sa altar. Pero dili na diay mahitabu. Magkaanak na siya sa laing babae ug mao ang pinakapait na kamatuoran.
Nagsugod na pud ug tulo ang akoang luha nga naghuna-huna. Unfair man kaayo ang kinabuhi. Kung mao man lang galing ang dangatan, nganung nagdugay pa man mi? Nganung niabot pa man siya sa akoang kinabuhi nga dili lang man diay siya ang para sa akoa. Sakit. Sakit kaayo pamalandungon. Dili ko kaako ug pakasal sa lalaki nga naa nay obligasyon sa uban. Dili naku gusto nga ihikaw sa bata ang katungod nga magdaku nga naay tibuok na pamilya.
Wala ra naku nabantayan nga nahuman na diay siya ug ligo. Nilingkod siya sa akoang atbang ug gikuha ug giabrihan ang beer. Wala ra siya nitingog. Pareha naku, hilum ra siyang naglantaw pud sa bintana.
"Nganung muabot ug mahimung parte pa man sa atoang kinabuhi ang mga tao nga dili lang man diay para sa atoa?" pangutana naku.
"Tanan naay purpose. Ingun sila, kung dili reason, lesson. Life is teaching you. Makauban man nimu sila or dili sa imuhang ugma, life must go on" maoy tubag niya
Nagpamahid ko sa akoang luha na wala jud niundang ang pagtulo. Nahurot na naku ang isa ka can, ug nagkuha na pud ko ug duha sa fridge. Mura lang ug juice nga gisigihan naku ug yaruk.
Tibay pud kaayo akoang ginhawaan kay wala man ko kabati ug kasuka*n sa sobrang nainum. Gasige lang ko ug balik-balik sa cr para mangihi.
Kadugayan nakung inum sa pang ikapila na to nga can gipugngan na ko niya. Iyaha ng giilog ang beer.
"Tama na, ayaw kaayo pasobra ug inum" ingun niya.
"Kulang pa" tubag naku ug gisulayan ug bawi sa iyaha ang beer
Nitindog na siya paingun sa counter ug gibutang didto ang beer. Nisulay ko ug sunod pero nisarasay naku maong nalargo ko ug katumba sa salog sa may tiilan sa kama. Tarung pa akoang utok pero dili na kaya sa akoang lawas.
Dali-dali na siyang niduol sa akoa, ug gisulayan ko niya ug alsa, pero wala na koy kusog mubarog. Nafeel naku ang kainit sa iyahang palad nga nadikit sa akoang mga bukton.
Nag-atbang na pud amuang mga nawong.
"Kiss me" ingun naku.
Nitutok ra siya sa akoa.
Akong giduol akoang nawong sa iyaha ug gigunitan siya sa aping. Nihana na ko ug kiss pero gipugngan ko niya sa akoang abaga.
"Hubog ka" ingun niya
"Wa koy labot" supak naku ug akoa na siya largong gibira ug gikiss.an. Tanan nakung kapungot akoang gipagawas sa kiss pero mura siya ug tuod. Wala siya ni respond maong pila ka sigundo akoa na dayon siyang gitulak.
"Unsay mali sa akoa?" puno ug kasakit na pangutana naku sa iyaha.
"Unsay kulang sa akoa?" nisugod na pud ug tulo akoang luha kay feeling naku dili ko enough. Na dili ko wife material. Na dili ako ang klase sa babae na gustuhon sa lalaki.
Out of frustration gisugdan na naku ug pasakit akoang kaugalingon. Yes, buang na siguro ko. Walay nakasabot sa akoang gibati. Walay nakabalu kung unsa kasakit ang akoang giagian.
Gigakos ko niya. Gipugngan ko niya para dili na naku magunitan akoang buhok.
"Shhhhhh" mao lang iyahang ingun.
Wala ko niundang ug hilak sa iyahang dughan. Wala ko kasabot pero sa kadugayan nakung hilak ug sa kainit sa iyahang gakos, naka feel ko ug comfort. Sa kada ingun niyang "tama na" feeling naku safe ko nga naa siya sa akoang tapad. Na walay lain makapasakit sa akoa basta naa ko sa iyahang kamot. Wala ko kaila sa lalaki. Wala koy idea kung kinsa siya. Pero gisalig naku akoang kaugalingon sa iyaha. Sa akoang kakapoy, wala ra ko kamatmon nga nakatulog na ko sa iyahang mga kamot.
Nakamata ko nga sakit kaayo akoang ulo. Siguro tungod sa hangover. Nipiyong usa ko ug naghinumdum sa kung unsa ang nahitabo sa niaging gabie, usa pa ko kalit nibangun human akong natiman-an nga naa man diay koy kuyog lalaki usa ko natulog. Gicheck naku akoang kaugalingon, wala ra ko naunsa. Suot lang gihapon naku ang shorts ug t-shirt nga iyahang gipahiram sa akoa ug nakahabol pa ko nga natulog. Gilibot-libot naku akoang panan-aw sa sulod pero wala naman koy kauban.
Taod-taod lang, nikalit na ug abri ang pultahan ug siya ang nisulod. Naa siyay daghang bitbit na plastic na take out na pagkaon. Ug nakit-an ko niya na galingkod lang gihapon sa bed.
"Hi, good morning" ingun niya ug ni smile
"Good morning" tubag pud naku na medyo naulaw gamay.
"Sakto ra diay akoang pagbalik, breakfast ta." Ingun niya ug gibutang na ang dalang pagkaon sa counter.
"Sige, brush sa ko" tubag naku ug nibangon na dayon largo sa cr.
"Sige, kay i prepare sad naku ni" pagtando niya ug gi andam na ang mga pagkaon.
Dili ko katuo sa akoang kaugalingon. Nakatulog ko nga kauban ang isa ka lalaking wala ko kaila. Bisan gani ang pangalan, wala pa ko nakabalu. Swerte kaayo ko sa part nga buotan siya. Wala ra ko naunsa sa tibuok gabie. Wala pa gyud diay ko gipasagdan ni Lord. Nag hygiene na ko human nibalik na ko sa sala.
Nakaready na tanan pagkaon pagbalik naku. Ug giandam na niya akoang bangko.
"Thank you" ingun naku ug naglingkod na.
"You're welcome" tubag ra pud niya human ni smile.
"Kining beef soup oh. Higup ug daghan para maulian ka sa hangover" iyahang giplastar sa akoang atubangan ang soup.
"Salamat" naulaw pa ko kay sobra siya ka asikaso jud.
Nagsige na siya ug pasiplat-siplat sa akoa samtang gakaon siya. Kadugayan siya na ang una nagpaila.
"Daryll diay" ingun niya nga nagtan-aw sa akoa ug naghulat sa akoang pangalan.
"Yen, Julliene" tubag pud naku.
Gwapo si Daryll. Tangkad. Pution na kutis mayaman. Kanang makita sa iyahang hitsura na edukado ug bright siya nga tao. Labaw sa tanan, kabalu siya murespeto ug isig ka ingun labi na sa pareha naku na babae.
Padayon ra ming nagkaon. Sure ko nga pareho ming duha nga daghan ug angay na ipangutana pero walay gusto una magsukit-sukit sa nagkadaiya namu nga storya sa kinabuhi.
"Sorry sa nahitabo gabie" ingun naku.
"Okay lang. Wala kay angay na ipangayo ug sorry." Tubag ni Daryll
"Salamat diay ani" pasabot naku sa iyang mga sinina na akoang gisuot
"Way problema" tubag niya ug nagpahiyum ra siya
"Unsay plano nimu karung adlawa?" pangutana niya na nagtan-aw sa akoa ug mura bag ginabasa akoang reaksyon
"Wala" tubag ra pud naku. Wala man jud koy plano.
"Kuyog ta unya maglibot-libot dri sa isla unya pagkahapon, mag ATV pud ta sa pikas resort, mga 90 minutes lang man nuon ang ATV." Imbeta niya nga naay kusog kaayo mangagni nga smile ug tinan-awan
Gahuna-huna pa ko. Nalibot naman hinuon naku to nga isla kay nagsige ra man mi ug tabok-tabok didto kauban akoang mga barkada pag college naku. Nakasulay na pud ko sa ginaingun niya nga ATV, kay halos tanan fun ug adventure nakuyog naman naku si PJ bisan asa.
"Sige na para malingaw ka. Dili ta ka pasagdan, ayaw ug kabalaka" Dugang pa niya
Sabagay. Gusto ra man naku ang malingaw. Ang makalimot. Sure ko nga secure ko nga kauban si Daryll kay kung dili pa, gipasagdan or giabuso na unta ko niya sa miaging gabie.
"Sige" tubag naku.
"Good!" Malipayon niyang ingun.
"Wala diay kay kauban diri?" Curious nga pangutana naku
"Wala" tubag niya nga medyo naay pait nga smile
"Ohh" automatic naku na reaction ug gitutukan naku siya.
"Laag-laag lang. Gustong mag inusara. Para makalimot" ingun niya
"Para makalimot" pagsumay naku.
Pareha mi ug tumong. Way siguro na pareha pud mig giagian. Pero siya na mismo ang niingon nga ang gusto niya kay ang makalimot, buot pasabot dili na angay pang ipangutana ang hinungdan sa tanan. Dili na angay usang storyahan ang kagahapon ug mga kasakit.
Human sa pamahaw, nibalik ko sa cottage naku. Nikuyog na si Daryll kay nagtapad ra lagi diay amuang nakuha nga cottage. Pagsulod naku, ang kalat nga akoang gibyaan usa ko nilakaw paingun sa dagat kagabie kay naa lang gihapon sa salog. Mga wala nay sulod na beer in can. Mga junk foods ug lechon manok nga abri lang na wa gani halos nakaon ug bisan unsa pang gamit nga naa sa bed.
"Sorry" pagpangayo naku ug pasaylo sa iyaha sa amuang naabtan. Wala jud pud hinuon ko kahuna-huna nga wa man diay ko ka panghipos usa ko nibiya sa cottage sa milabayng gabie. Naulaw na hinuon ko sa kay Daryll.
"Masabtan ra" nagkatawa niyang tubag
Dili man jud unta ko burara. Limpyada man unta ko na babae. Pero nawala ko sa akoang buot tungod sa kasakit nga akoang nasinatian. Kanang mura ug wala na koy pakialam sa tanan kagabie.
Nagdali-dali ko ug pamunit sa gakatag na kalat ug nitabang na si Daryll. Giingnan naku siya nga ako na lang lagi manglimpyo pero ni insist jud na siya nga mutabang. Gipasagdan na lang pud naku hangtod sa nahuman mi.
Nakit-an naku ang phone sa bed. Kinahanglan diay naku mag update sa akoang mama para dili na sila mabalaka. Gi off naku ang airplane mode ug as expected, napuro notification sa messages ug missed calls ang nanulod. Gi dialan naku si Mama hangtod sa iyang gitubag. Klaro ang kabalaka niya pero nawala ra dayon pag ingun naku na okay ra ko. Ga joke pa ko nga naugmaan pa lagi ko. Wa ra kaayo naku gidugay ang tawag. Tama ra nga mapahibalu naku sila nga wala ra ko naunsa sa layo.
Pagkahuman sa tawag, nananghid na ko sa kay Daryll na mag-ilis usa ug panglaag kay iyaha pa baya nga sinina akoang suot ato na time. Maayo gani kay naapil naku ug butang sa bag ang pang trekking na short ug sport sando. Naa pud akoang trek sandals. Duha ra man gud akoang paingnan permi ug magtravel. Kung dili sa dagat, sa buntod maong permi ng nakaready akong swimwear ug pang trekking na gamit.
Nihapit pa mi sa cottage ni Daryll usa nanlakaw kay nag-ilis pud na siya ug sportswear dayon nanlargo nami sa parking lot. Naa pud diay siyay dalang sakyanan nga niadto sa resort. Dili basta-basta na tao si Daryll, sure ko. Pero wala pa koy interest magpangutana sa iyahang background. Tama ng nakabalu ko sa iyahang first name ug siya pud sa akoang first name.
Gikan sa resort nga daplin sa dagat, naabot mi ug byahe paingun sa pikas municipality kung diin naa ang falls. Wala mi plano mangaligo kay lagi, laag-laag lang amuang giadto didto.
Kung tan-awon siguro, mura mi ug gadate date na mag-uyab, pero wala lang sila kabalu nga ngalan ra gani amuang nahibal-an sa matag-usa.😂
Walay nahisgutan na kaagi. Walay nahibal-an nga trabaho or unsa man na panghitabo nga naay kalabutan sa kagahapon. Puro appreciation lang sa palibot ug "adto ta didto" or "tara" lang ang madungog sa amuang duha.
Bisan asa ra mi gahapit-hapit ug pamalit ug pagkaon ni Daryll. Katawa diri, katawa didto hangtod nangadto nami kung diin naa ang ATV. Siya ang nisagot sa bayad. Ni offer ko na magtunga mi pero siya ra jud lagi daw. Eh di go.💁
Offroad trails amuang gisundan, nangabot mi sa lapukan ug perti nakung samuka nga angkas niya kay gakalapok na mi pero diretso lang gihapon. Game kaayo ming duha nga gihuman ang isa ka oras ug tunga nga adventure. Nagsige ra mi ug pangatawa sa hitsura namung duha after sa trail.
Nakumpara naku si Daryll ug si PJ. Sa physical na aspeto halos magka level lang silang duha. Kung sa pag care pud, pareho silang duha kung muamping. Gawas lang sa naulahing sala ni PJ sa akoa, mao ang nakalahi sa ilahang duha. Pero gi disregard ra naku, wala pa koy gibati nga attraction sa kay Daryll kay naa pa ko sa point nga grieving sa nahitabo namung duha ni PJ.
Nangaon pa mi daan sa gawas usa mi namalik sa resort. Tanan kay si Daryll ang nigasto.
Pag-abot namu sa parking, nag-iyahay na mi ug balik sa cottage para makaligo kay nagkalapok lagi ming duha pero nagpasidaan na si Daryll na sunduon daw ko niya sa cottage arun magtambay mi sa gawas inig ka gabie kay naa may palabas na fire dance. Nisugot ra pud ko.
Pagbalik naku sa room, nilargo na ko sa shower room. Pila ka minuto pud nga gatan-aw ko sa akoang reflection sa salamin. Gwapa man ko. Tangkad. Sexy. Puti. Edukada. Limpyo na babae. Gisayangan lang ni PJ. Ouch. 😕 Dili katuohan pero sa tibuok adlaw, halos nakalimtan naku ang kasakit nga giagian naku kagahapon. Nindot man diay ang kinabuhi. Nindot pa man diay ang mabuhi.
Nagdali na ko dayon ug ligo kay basin mahutdan ko ug oras. Dayon nag-ilis na ko ug swimsuit ug gipatungan naku ug see through nga dress. Nagmake-up na pud ko. Waterproof man nuon maong okay lang kung maka decide ug ligo sa pool human sa palabas.
Taod-taod lang naa nay ni doorbell. Gisilip naku sa peephole ug si Daryll ang naa. Nagdali-dali na ko ug kuha sa purse ug nanlakaw na mi ug nanlingkod sa usa ka table kung diin ipahitabo ang activity.
Nag-order si Daryll ug isa ka bucket na San Mig Light ug sisig na pang pulutan. Naay mga comedians maong wala jud mi undang ni Daryll ug pangatawa. Human naay firedance, ug live bands ang sa pinaka ulahi na part. Mga pila pud mi ka oras didto usa nahuman.
Nakainum na mi pareho. Gikapoy pud mi sa laag-laag namu sa adlawan maong nakadesisyon na mi nga mangatulog na lang arun makapahulay. Gihatod ko ni Daryll sa cottage. Nagpasalamat ra pud ko sa tanan libre ug sa kalingaw na kauban siya. Ingun man, nagpasalamat pud siya nga gikuyugan naku siya. Human hygiene, natulog na ko largo.
Kadlawon sa dihang nakamata ko kay kaihion jud kaayo ko ato. Pero lahi akoang feeling kay gikulbaan ko ug maayo. Gikuha naku ang phone ug gi off ang airplane mode. Perting daghana sa notifications. Nagklase klase lang. Sa tanan messages, chat permi sa akoang ig-agaw akoang ginauna ug basa kay sukad, siya naman akoang permi nga informant. Nagpahibalu siya nga naa sila sa hospital kay giatake akoang lola. Grabe daw ang kahimtang ug naa na daw sa ICU.
Dali ra kaayo ko nakapanghipos sa tanan nakung gamit. Human ma settle tanan bill, nilargo na ku ug drive pauli. 24 hrs man hinuon ang barge maong nakatabok ra ko dayon pabalik sa city.
Close naku ang akoang lola pero daan na jud siyang naay sakit. Sa akoang auntie nga bunso sa akoang papa ni siya nagpuyo. Naa nuoy caregiver na naga assist sa iyaha kung naa tanan sa work ang mga tao sa balay. Permi lang namu na siyang ginabisita kay duol ra man pud hinuon ilahang balay sa amua.
Kusog akoang padagan pero amping pud hinuon ko nga nagdrive. Wala na ko ka pananghid kay Daryll nga muoli tungod sa emergency pero unsaon ta man.
"Daryll" ra jud akoang nahibal-an sa iyaha. "Yen" ra pud iyahang nahibal-an sa akoa. Sama sa giingun niya, muabot ang tao sa imuhang kinabuhi nga naay purpose. Either reason or lesson. Sa iyahang case, siya ang nahimung rason nga nakalimut ko sa kasakit bisan sa isa ka adlaw lang.
{To be continued...}
No comments:
Post a Comment